Skólanámskrá
Tónlistarskóla Álftaness
2007

Efnisyfirlit

• Formáli
• Hlutverk skólanámskrár Tónlistarskóla Álftaness
• Hlutverk og markmið skólans
• Forskóli - tónmennt
• Hljóðfæra- og söngnám og námskröfur
• Tréblásturshljóðfæri
• Málmblásturshljóðfæri
• Slagverkshljóðfæri
• Píanó
• Strengjahljóðfæri
• Gítar
• Söngur
• Skapandi starf
• Samspil og samsöngur
• Tónfræðagreinar
• Hljóðver
• Tónfundir - Tónleikar
• Próf
• Prófskírteini
• Einkanámskrá
• Samstarf við aðra tónlistarskóla
• Samstarf við aðra skóla á Álftanesi
• Samstarf við foreldra og forráðamenn
• Fréttabréf
• Hagnýtar upplýsingar
• Skólareglur
• Fastir liðir í skólastarfinu
• Forsaga og þróun skólans
• Upphafið
• Skólanefnd
• Forskóli
• Kórastarf og hljómsveitir
• Tónleikahald
• Afmælistónverk
• Foreldra- og velunnarafélag
• Aðsókn og biðlisti
• Húsnæðismál
• Rekstur og fjármögnun
• Framtíðarsýn
• Til foreldra og forráðamanna

Formáli

Skólanámskrá Tónlistarskóla Álftaness kemur hér út í annað sinn. Þá hefur skólanefnd, sveitarstjóri og foreldrafélagið fengið hana til aflestrar og gagnrýni.

Í námskránni er leitast við að gefa góða heildarmynd af starfsemi skólans, þar á meðal skipulagi, námi, kennslu, uppbyggingu skólastarfsins og kennsluháttum. Einnig er í henni að finna stutt ágrip af sögu og þróun skólans.

Þess er vænst að skólanámskrá Tónlistarskóla Álftaness komi foreldrum og forráðamönnum barna í skólanum að góðu gagni.

Álftanes, apríl 2007
Sveinbjörg Vilhjálmsdóttir
skólastjóri

Hlutverk skólanámskrár Tónlistarskóla Álftaness.

Í aðalnámskrá tónlistarskóla sem gefin var út í maí árið 2000 er gert ráð fyrir að hver og einn skóli gefi út eigin námskrá þar sem fram komi sérhæfð og staðbundin markmið skólans en samt tekið mið af stefnumörkun aðalnámskrárinnar. Hefur þetta verið haft að leiðarljósi við gerð þeirrar námskrár sem hér birtist.

Þess er að vænta að meginatriði námskrárinnar séu hin sömu ár frá ári þó endurskoða þurfi ýmsa liði hennar reglulega.

Hlutverk og markmið skólans

Hlutverk skólans er að stuðla að aukinni hæfni nemenda til að flytja, njóta og skilja tónlist. Efla tónlistarlíf almennt og gera nemendur virkari og sjálfstæðari hlustendur.

Starfsemi skólans byggir meðal annars á þeim grunni að markvisst tónlistarnám stuðli að auknum þroska nemenda. Vitað er að tónlistarnám þjálfar nemendur í öguðum vinnubrögðum, bæði sem einstaklinga og í hópi, bætir sjálfsímynd og árangur í almennu námi.

Skólinn hyggst ná markmiðum sínum með því að veita almenna tónlistarfræðslu, þ.e. að kenna nemendum sínum að leika á hljóðfæri, syngja og skapa eigin tónlist.

Hljóðfæranám, söngnám og námskröfur

Hljóðfæranám fer fram í einkatímum og byggist á náinni samvinnu kennara og nemanda. Fullt nám er 2 x 30 mínútur eða 1 x 60 mínútur í viku hverri. Í upphafi er lögð áhersla á undirstöðuatriði í hljóðfæraleik; nótnalesti, túlkun, tækni og tónfræði. Eftir því sem nemandinn nær betri tökum á hljóðfærinu tekst hann á við og kynnist verkum frá hinum ýmsu skeiðum tónbókmenntanna. Leitast er við að hafa efnisvalið fjölbreytt og taka tillit til áhugasviðs nemenda. Annar mikilvægur þáttur námsins er að virkja sköpunarþörf og ímyndunarafl hvers einstaklings svo þeir þættir fái betur notið sín.

Til þess að ná góðum árangri er nauðsynlegt að nemendur æfi sig daglega.

Forskóli - tónmennt

Í forskólanum er lögð áhersla á söng hreyfingu, hlustun og að spila á hljóðfæri. Nemendur læra margvísleg lög frá hinum ýmsum löndum, dansa og upplifa tónlist í gegnum hreyfingu. Hlusta á aðgengileg verk og gera ýmis verkefni í tengslum við þau. Nemendur fá tækifæri til að spila Orff hljóðfæri og einnig læra allir nemendur í 2. bekk á blokkflautu. Forskólinn veitir nemendunum þannig almenna undirstöðu fyrir frekara tónlistarnám ásamt því að glæða áhuga þeirra fyrir tónlist.

Forskólinn/tónmennt er í stundatöflu 1. og 2. bekkinga í Álftanesskóla þannig að öll börn á Álftanesi fá ókeypis forskólakennslu. Kennslustundir eru tvær á viku, 40 mínútur í senn. Bekknum er skipt niður í tvo hópa sem mæta á sama tíma, hvor með sinn kennara.

Tréblásturshljóðfæri

Hljóðfæri tréblástursdeildar eru þverflauta, klarínett, óbó, fagott og saxófónn. Æskilegt er að þeir nemendur sem hefja nám á tréblásturshljóðfæri séu á aldrinum átta til níu ára, en það er nokkuð háð stærð nemanda og þroska

Málmblásturshljóðfæri

Hljóðfæri málmblástursdeildar eru trompet, horn, básúna og túba. Nemendur geta hafið nám átta til níu ára.

Slagverkshljóðfæri

Slagverksnám skiptist í nám á sneriltrommur og trommusett annarsvegar og ásláttarhljómborð hinsvegar.

Skilyrt era ð nemendur læri á bæði hljóðfærin frá byrjun náms, en þó má í undantekningartilfellum leyfa nemendum á 1. ári að læra á annaðhvort hljóðfærið, í takmarkaðan tíma þó (1 önn), og er það leyfi háð mati og samþykki hljóðfærakennara nemandans. Uppsetning námsins er sú að nemendur taka bæði hljóðfærin fyrir á 1. ári. Á 2. ári mega nemendur taka fyrir annað hvort hljóðfærið í fullu námi í stað beggja hljóðfæra (2x30 mínútur). Á þriðja ári þurfa nemendur að taka aftur til við bæði hljóðfærin skv. Uppsetningu námsins. Þó má gera undantekningu frá þessari reglu sem er háð mati og samþykki hljóðfærakennara nemandans. Til grunnprófs (tekið í fyrsta lagi á 3. ári), þurfa nemendur þó að hafa hlotið fullnægjandi undirbúning á bæði hljóðfærin. Mikil árhersla er lögð á færni í nótnalestri ásamt þjálfun í að spila á hljóðfæri eftir eyra.

Píanó

Æskilegur byrjunaraldur í píanónámi er sjö til átta ár. Þó er hægt að byrja fyrr ef nemandinn hefur öðlast nægilegan þroska. Skilyrði fyrir píanónámi er að nemandinn hafi óhindraðan aðgang að píanói til æfinga.

Strengjahljóðfæri

Hljóðfæri strengjadeildar eru fiðla, víóla, selló og kontrabassi. Nemendur geta hafið nám fimm til sex ára gamlir; þó er hægt að byrja fyrr ef þroski leyfir.

Gítar

Gítarnám getur hafist á aldrinum sex til sjö ára. Kennt er á klassískan gítar, rafgítar og bassa. Grunnur námsins er hinn klassíski gítar, sérstaklega með tilliti til tækni og nótnalesturs. Rytmisk tónlist getur verið hluti af náminu eftir að grunnfærni er náð á hljóðfærið.

Söngur

Söngnám hefur nokkra sérstöðu miðað við hljóðfæranám. Hæfilegt þykir að hefja söngnám 17-18 ára en þó er það háð þroska einstaklingsins. Undirstöðuatriði söngnáms er raddabeiting og öndun auk réttar líkamsbeitingar. Túlkun texta, fallegur framburður og leikræn tjáning eru mikilvægir þættir í náminu. Í upphafi náms er meðleikur (pianó) eftir þörfum en mun meiri og reglulegri á efri stigum námsins. Í samsöngstímum fá nemendur tækifæri til að syngja í minni og stærri hópum auk þess að syngja fyrir aðra nemendur söngdeildar. Starfandi er unglingadeild fyrir 13-16 ára.

Skapandi starf

Í aðalnámskrá tónlistarskóla er gert ráð fyrir að eigin lagasmíðar séu hluti af náminu. Kennarar sinna skapandi starfi í hljóðfæratímum og tónsmíðahátíð er orðin fastur liður í starfi skólans.

Samspil og samsöngur

Samspil er mikilvægur þáttur í hljóðfæranáminu og ánægja af slíku hópstarfi er jafnframt hvatning fyrir hvern og einn til framfara í tónlistarnáminu. Reynt er að sjá til þess að allir nemendur sem hafa til þess getu og þroska öðlist reynslu í samleik, jafnt í stórum hópum sem smáum. Í skólanum fer fram samspil af ýmsum toga s.s. strengja-, gítar-, slaverks-, tréblásturs-, og rytmísktssampil ásamt blönduðu samspili. Samspilsvika er haldin ár hvert og endar með tónleikum.

Tónfræðagreinar

Tónfræði er kennd í samræmi við aðalnámsskrá tónlistarskólana. Leitast er við að hafa námið fjölbreytt þannig að nemendur kynnist tónlistinni frá sem flestum sjónarhornum. Dæmi um áfanga í tónfræði er: hlustun, tölvur og tónlist, tónsmíðar/sköpun og tónheyrn. Tónfræði er skyldufag fyrir alla, frá með 5. bekk.

Hljóðver

Nám í hljóðveri/tölvutónlist getur hafist þegar nemendur hafa byrjað í 9.bekk. Markmið námsins er að nemendur læri helstu atriði hljóðvinnslu á tölvu. Námið skiptist í nokkra þætti: upptökur, hljóðvinnslu, hljóðhönnun, tónsköpun/tónsmíðar og nótnaritun og hljóðfræði. Kennt er í litlum hópum, 2-3 nemendur í senn. Gert er ráð fyrir að nemendur sæki tíma í tónfræðum eins og aðrir tónlistarnemendur.

Tónfundir - Tónleikar

Reglulegur flutningur tónlistar á tónleikum og tónfundum er mikilvæg reynsla fyrir nemendur. Gert ráð fyrir að hver og einn komi fram á tónfundum innan skólans, því er efnt til opinberra tónleika s.s. jólatónleika, tónleika á degi tónlistarskólanna, tónleika á degi tónlistarinnar og vortónleika.Fastur liður í starfi skólans er að heimsækja hinar ýmsu stofnanir, svo sem sjúkra- elli-, og hjúkrunarheimili og halda tónleika. Hópferðir eru farnar árlega t.d. á sinfóníutónleika eða í óperuna.

Próf

Próf samkvæmt aðalnámskrá skiptast í grunn- mið- og framhaldsnám. Skólinn skiptir þessu námi í smærri einingar þ.e. stigspróf. III stig jafngildir grunnprófi, V stig jafngildir miðprófi og VII stig jafngildir framhaldsprófi. Stigspróf eru haldin í byrjun desember og á vorin, venjulega síðustu dagana fyrir páskaleyfi. Ávallt er reynt að hafa utanaðkomandi prófdómara til að dæma stigspróf. Athuga þarf að til þess að stigspróf sé gilt þarf nemandi að hafa lokið hliðstæðum tónfræðigreinum.

Lengd námstíma innan hvers áfanga er mismunandi og ræðst af ástundun, getu og þroska hvers einstaklings. Kennari metur hvort og hvenær nemandi þreytir áfangapróf eða stigspróf. Vorpróf eru haldin til að meta framfarir nemenda. Allir nemendur sem ekki þreyta stigspróf taka vorpróf.

Prófskírteini

Prófskírteini eru veitt öllum sem taka vorpróf og stigspróf. Á skírteininu er að finna einkunn og umsögn prófdómara um framistöðu á prófi auk námsárangur yfir veturinn. Stigsprófsskírteini og vorprófsskírteini eru afhent við skólaslit. Allir nemendur fá umsögn í lok vetrar.

Einkanámskrá

Hver nemandi í skólanum gerir einkanámskrá í byrjun hvers skólaárs ásamt kennara sínum og foreldri. Þar kveður á um áform vetrarins. Einnig skráir kennarinn t.d. þá tónleika og tónfundi sem nemandi tekur þátt í á skólaárinu. Nemandi fær afhenta námskrána í lok vetrar.

Samstarf við aðra tónlistarskóla

Í gegnum árin hefur verið töluvert samstarf við aðra tónlistarskóla. Farið hefur verið í tónleikaferðir, innan- sem utanlands og haldnir sameiginlegir tónleikar með öðrum tónlistarskólum. Stefnt er að því að halda þessu samstarfi áfram.

Nemendur Tónlistarskólans halda árlega tónleika fyrir Álftanesskóla og leikskólana. Tónlistarskólinn stendur fyrir tónleikum á hverjum vetri þar sem þekktir listamenn koma í heimsókn og halda tónleika fyrir nemendur Álftanesskóla og leikskóla sveitafélagsins.

Samstarf við aðra skóla á Álftanesi

Öll börn í fyrstu tveimur bekkjum Álftanesskóla fá forskólakennslu sem fyrr segir. Nemendur koma út úr tímum í Álftanesskóla til að sækja einkatíma í Tónlistarskólanum.

Samstarf við foreldra og forráðamenn

Samvinna við foreldra er mjög mikilvæg. Á haustin er haldinn foreldrafundur fyrir foreldra nýrra nemenda þar sem kennarar skólans kynna sér starfsemina. Á haust-, og vorönn er foreldravika þar sem foreldrum er boðið að fylgjast með kennslustund. Foreldrar eru hvattir til að hafa samband við kennara hvenær sem þurfa þykir. Nauðsynlegt er að foreldrar fylgist náið með hljóðfæranámi barna sinna, hvetji þau og fylgi eftir leiðbeiningum kennara um heimavinnu. Því fær hver nemandi stílabók í fyrsta hljóðfæratíma sínum þar sem kennarinn skrifar hvað nemandinn á að æfa fyrir næsta tíma. Þannig geta foreldrar fylgst með hvers ætlast er til af nemandanum hverju sinni og fylgt því eftir.

Fréttabréf

Fréttabréf er að jafnaði gefið út einu sinni á önn.

Hagnýtar upplýsingar

• Starfstími Tónlistarskóla Álftaness hefst um miðjan ágúst og stendur fram í júní. Vetrarleyfi eru yfirleitt í samræmi við leyfi í Álftanesskóla. Forföll tilkynnist tímanlega til viðkomandi kennara eða á skrifstofu skólans í síma 565-2625 Netfang skólans er tonlistarskoli@alftanes.is
• Lögbundin frí við skólann eru eftirfarandi: jólafrí og páskafrí samkvæmt skóladagatali, uppstigningardagur, sumardagurinn fyrsti, 1. maí og annar í hvítasunnu. Sérstakir frídagar hjá Álftanesskóla, til dæmis skipulagsdagar kennara, eru ekki frídagar í Tónlistarskólanum.
• Vor-, stigs- og áfangapróf eru haldin síðustu dagana fyrir páskaleyfi eða á vorin.
• Innritun og skólagjöld Nýir nemendur eru skráðir í skólann að vori og hausti. Við innritun að hausti er í fyrstu gengið frá innritun nemenda frá fyrra ári en síðan tekið á móti nýjum umsóknum. Skráning fer fram á netinu á vefsíðu sveitarfélagsins, slóðin er www.alftanes.is/eyðublöð. Bæjarskrifstofan sér um innheimtu skólagjalda. Ganga þarf frá skólagjöldum við innritun áður en kennsla hefst en þeim má skipta yfir veturinn eftir samkomulagi. Bæklingur með upplýsingum varðandi skólagjöld og fleira er dreift í öll hús í sveitarfélaginu í ágúst ár hvert
• Hljóðfæri eru leigð út til byrjenda gegn vægu gjaldi. Foreldrar skrifa undir leigusamning þar sem kveðið er á um ábyrgð á hljóðfærinu. Þegar ljóst þykir að nemandinn haldi áfram námi er gert ráð fyrir að hann eignist sitt eigið hljóðfæri.
• Nótnabækur vegna hljóðfæranáms þurfa nemandur að kaupa sjálfir og er nauðsynlegt að þeir eignist sitt eigið nótnasafn.
• Nemendaskírteini: Til að fá nemendaskírteini þarf að skila inn ljósmynd á skrifstofu skólans. Skírteinið veitir nemendum m.a. afslátt af tónleikum Sinfóníuhljómsveitar Íslands og ýmsum öðrum listviðburðum.
• Foreldra- og velunnarfélag tónlistarskólans hefur starfað í nokkur ár. Félaginu er ætlað m.a. að auka samskipti milli forráðamanna nemenda og skólans. Öllum er heimild aðild að félaginu. Núverandi formaður er Kristín Sigurleifsdóttir
• Öllum íbúum og börnum starfsmanna sveitarfélagsins er heimil innganga í skólann, en grunnskólabörn hafa forgang og greiða lægra skólagjald en aðrir.

Skólareglur

1. Nemendum ber að mæta stundvíslega í allar kennslustundir. Fjarvistir og ástæður fyrir þeim skulu tilkynntar til viðkomandi kennara eða í síma Tónlistarskólans (s: 565 2625) af foreldri/forráðamanni. Síendurteknar fjarvistir án leyfis geta varðað brottvikningu úr skólanum.
2. Kennara er ekki skylt að bæta upp þær kennslustundir er kunna að falla niður vegna veikinda hans eða nemanda. Veikist kennari til langs tíma, reynir skólinn að útvega forfallakennara.
3. Nemendur skulu ganga vel og snyrtilega um skólann og eigur hans, fara úr skóm í anddyri og hengja yfirhafnir á snaga.
4. Nemendum sem taka á leigu hljóðfæri hjá skólanum ber að fara vel með þau. Nemendum er bannað að lána hljóðfærin. Viðhald hljóðfærisins á lánstímanum og skemmdir af völdum slæmrar meðferðar eru á kostnað nemanda.
5. Nemendur sem spila á tónleikum eru skyldugir til að mæta á æfingar fyrir tónleikana.
6. Nemendur mæti snyrtilega klæddir á tónleika.
7. Nemendum er óheimilt að taka að sér opinberan flutning tónlistar utan skólastarfsins nema með samþykki kennara eða skólastjóra.
8. Nemendum er skylt að taka þátt í tónleikum og annari starfsemi sem kennari ákveður.
9. Nám í tónfræðagreinum er skylda allra hljóðfæra- og söngnemenda.

Fastir liðir í skólastarfinu

• Foreldrafundur fyrir foreldra nýrra nemenda.
• Tónleikar á degi tónlistarinnar í lok október.
• Foreldravika á haustönn.
• Tónfundir.
• Samspilsvika.
• Jólatónleikar í Bessastaðakirkju.
• Tónleikar á degi tónlistarskólanna í lok febrúar.
• Foreldravika á vorönn
• Tónsmíðahátíð.
• Vortónleikar.
• Þátttaka í messum og tónlistarflutningur fyrir félagasamtök.
• Tónleikaferðir á sjúkra- elli og hjúkrunarheimili.
• Árleg tónleikaröð þar sem listamenn koma og spila fyrir leikskóla og nemendur Álftanesskóla.
• Nemendur þreyta próf árlega. Ef ekki eru tekin áfanga- og stigspróf þá vorpróf.
• Tónleikar nema tónlistarkólans fyrir leikskóla og Álftanesskóla.

Forsaga og þróun skólans

Upphafið

Tónlistarskóli Bessastaðahrepps var stofnaður 1987, en frá 1982 var í hreppnum starfrækt deild úr Tónlistarskóla Garðabæjar. Aðalhvatamenn að stofnun hennar voru Erla Sigurjónsdóttir þáverandi oddviti, Jytte Frímannsson og María Sveinsdóttir. Alma Hansen var skólastjóri Tónlistarskóla Garðabæjar á þessum tíma, en 1984 tók Gísli Magnússon píanóleikari við stjórn skólans. Sveinbjörg Vilhjálmsdóttir var deildarstjóri Álftanesdeildar frá 1984 og síðan skólastjóri Tónlistarskóla Álftaness frá upphafi.

Skólanefnd

Þriggja manna skólanefnd hefur verið við skólann frá upphafi. Jytte Frímannsson hefur lengst af verið formaður nefndarinnar, frá 1982 til 1994. Núverandi formaður er Karólína Eiríksdóttir.

Forskóli

Haustið 1986 var forskóli starfræktur í tveimur deildum og var fjögurra ára börnum þá í fyrsta sinn veittur aðgangur að skólanum. Það hélst óbreytt til 1996, en þá var forskólinn fluttur úr Tónlistarskólanum í Álftanesskóla. Sem fyrr getur fá nú öll börn 1. og 2. bekkjar forskóla/tónmenntakennslu tvisvar í viku.

Kórastarf og hljómsveitir

Barnakór Tónlistarskólans var stofnaður 1988. Kórarnir urðu tveir árið 1993 og skiptist í yngri og eldri kór. Yngri kórinn var fyrir 1.-3. bekk en vegna fjölda nemanda er hann nú ætlaður nemendum í 2.-3. bekk. Eldri kór er fyrir nemendur í 4.-7. bekk. Frá 1996 tilheyra kórarnir bæði Tónlistarskólanum og Álftanesskóla og heita nú Skólakórar Álftaness. Æfingar eru að jafnaði einu sinni í viku, u.þ.b. klukkustund í senn. Kórarnir hafa undanfarin ár verið með föst verkefni á sínum snærum s.s. að taka þátt í guðþjónustum í Bessastaðakirkju u.þ.b. 5-6 sinnum á ári, komið fram á Syngjandi jólum í Hafnarfirði, farið á árlegt kóramót í Víðstaðakirkju, Hafnarfirði, haldið sjálfstæða jóla- og vortónleika, sungið við jólatréð á Álftanesi, farið í æfingabúðir, óvissuferðir og sinnt ýmsum til fallandi verkefnum. Kórarnir hafa 2 sinnum gert geisladisk sem hefur verið seldur á vægu verði til kórfélaga og aðstandenda þeirra auk íbúa á Álftanesi.

Undanfarin ár hafa kórarnir verið undir stjórn Álftanesskóla. Lítil lúðrasveit var við skólann fyrr á árum, en erfitt hefur verið að fá nemendur til að læra á málmblásturshljóðfæri undanfarin ár. Lítil stengjasveit hefur hins vegar verið starfandi til margra ára.

Tónleikahald

Tónleikar Tónlistarskólans hafa verið með ýmsu móti. Oft hafa þeir verið helgaðir einu tónskáldi, Bach, Mozart o.s.frv., sem hefur þá verið kynnt í tali og tónum. Einnig hefur verið fjallað um hin ýmsu tímabil tónlistarsögunnar og einstök tónlistarform, haldnir þjóðlagatónleikar, tónleikar tileinkaðir íslenskum tónskáldum og svo mætti lengi telja.

Haustið 1999 veitti hreppsnefnd fjárstyrk til að hleypa af stokkunum tónleikaröð í hreppnum fyrir börn og unglinga. Það ár voru haldnir alls fimm tónleikar. Tónleikaröð þessi er nú árlegur viðburður í starfi skólans. Þetta framtak hreppsnefndar var mjög vel til fundið og ber að þakka þá framsýni og vilja sem nefndin sýndi í tónlistarmálum í sveitarfélaginu.

Afmælistónverk

Þrjú tónverk hafa verið pöntuð fyrir skólann, á fimm og tíu ára afmæli hans. Hér er um að ræða "Rókókókókflöskusvítuna" eftir John Speight við ljóð eftir Þórarinn Eldjárn og "Álftanessvítuna" eftir Karólínu Eiríksdóttur og nemendur skólans og ??? eftir Tryggva Baldvinsson. Verkin voru flutt á 5. 10. og 15. ára afmælum skólans og tóku allir nemendur þátt í flutningi þeirra. Öll tónskáldin eru búsett á Álftanesi. Þess er vænst að framhald geti orðið á þessum þætti starfseminnar.

Foreldra- og velunnarafélag

Foreldrafélag var stofnað við skólann 1991 og starfaði vel þann vetur. Meðal annars aðstoðaði það við fjáröflun kórsins, svo sem hlutaveltu og kökubasar og við að sauma kórbúninga. Félagið lagðist hins vegar af eftir að hafa starfað rúmt ár.

Þann 5. febrúar 2000 var stofnað Foreldra- og velunnarafélag Tónlistarskólans. Fyrsti formaður þess var Sigurður G. Bogason, en núverandi formaður er Kristín S. Sigurleifsdóttir. Félaginu er ætlað að auka samskipti milli forráðamanna nemenda og skólans. Einnig er því ætlað að vera vettvangur opinnar umræðu um skólastarfið og eins

Aðsókn og biðlisti

Frá upphafi hefur verið mikil aðsókn að skólanum og lengi vel var biðlisti meðan kvóti var á nemendafjölda. Árið 1994 ákvað hreppsnefnd að leitast yrði við að verða við öllum umsóknum sem bærust og er biðlisti því að mestu úr sögunni.

Á fyrsta ári skólans, 1982, voru innritaðir 52 nemendur að forskóla meðtöldum, en 12 þeirra hættu um áramót. Árið 2007 voru 136 nemendur skráðir í skólann.

Húsnæðismál

Húsnæðismál Tónlistarskólans voru erfið frá upphafi og fékkst ekki viðunandi lausn á þeim fyrr en tekið var í notkun núverandi húsnæði skólans haustið 2000.

Álftanesdeild Tónlistarskóla Garðabæjar tók til starfa í janúar 1982 í húsnæði Álftanesskóla eftir skólatíma. Haustið 1984 var hins vegar orðið ljóst að Álftanesskóli gat ekki sinnt húsnæðisþörf deildarinnar. Því var ákveðið að augýsa eftir viðbótaraðstöðu fyrir skólann. Hún fékkst í íbúðarhúsnæði skammt frá skólanum hjá velviljuðum, músíkelskandi hjónum, Árna Björnssyni og Guðnýju Bjarnar, sem settu ekki fyrir sig hávaða sem fylgir hljóðfærakennslu og sífelldan átroðning. Forskólakennsla fór fram í kjallaranum, en píanókennsla í stofu húsráðenda á þeirra eigin flygil! Haustið 1985 var tekin í notkun viðbygging við Álftanesskóla og fluttist þá öll starfsemi skólans þangað. Þar var hún óslitið til til ársins 1990, en þá fékk skólinn aðstöðu í nýbyggðu íþróttahúsi hreppsins.

Haustið 2000 var tekið í notkun sérinnréttað húsnæði fyrir Tónlistarskólann. Það var í austurálmu íþróttahússins. Þar voru þrjár hljóðeinangraðar sérkennslustofur, ein hópkennslustofa, sem var einnig tónmenntastofa Álftanesskóla, svo og skrifstofa og kennarastofa með vinnuaðstöðu, auk aðgangs að sal hússins. Þetta gjörbreytti allri vinnuaðstöðu við skólann. Þó vantaði aðstöðu fyrir rytmískt samspil, rafgítar og trommur og var því brugðið á það ráð að taka á leigu húsnæði í Landakoti sem gengur undir nafninu "Fjósið" og er það enn í notkun.

Haustið 2005 flutti skólinn úr íþróttahúsinu í nýja álmu í Álftanesskóla. Þar höfum við 5 kennslustofur auk tónmenntastofu sameiginlegri með Álftanesskóla. Slagverksstofa er gamla tónmenntastofan í íþróttahúsinu. Í sameiginlegri byggingu með Álftanesskóla er mun auðveldara að fá börn út úr tímum á skólatíma en það skiptir miklu máli fyrir alla starfsemi skólans.

Nú eru á teikniborðinu tillögur um stækkun á húsnæði tónlistarskólans en áætlað er að þeirri byggingu verði lokið 2010.

Rekstur og fjármögnun

Tónlistarskóli Álftaness hefur frá upphafi verið rekinn af sveitarfélaginu og starfsemi hans fjármögnuð af sveitarsjóði og með námsgjöldum.

Framtíðarsýn

Tónlistarskólinn er jákvæður gagnvart heilsdagsskóla þar sem listnám og annað tómstundarnám er fellt inn í samfelda stundarskrá barnanna. Það hlýtur að börnunum í hag að hafa samfellda stundaskrá og í ljósi þeirra hagsmuna hlýtur það að vera eitt af aðalmarkmiðum skólans í nánni framtíða að leysa úr þessu máli.

Fullur áhugi er fyrir því að koma á fullorðinsfræðslu í tónlist við skólann þar sem kennd væru undirstöðuatriði greinarinnar, auk þess sem hlustað yrði á ýmis konar tónlist.

Stefnt er að stofnun lúðrasveitar með þátttakendum úr öllum aldurshópum og efla ennfrekar hljómsveitasamspil.

Áhugi er á að fá tónskáld til að halda námskeið fyrir nemendur skólans.

Til foreldra og forráðamanna

• Mikilvægt er að nemendur búi við jákvætt viðhorf til tónlistarnámsins, að foreldrar/forráðamenn sýni náminu áhuga og fylgist með framvindu þess.
• Hljóðfæranám byggist að miklu leyti á daglegri og reglubundinni þjálfun og er því að verulegu leyti heimanám. Án markvissra æfinga verður árangur rýr
• Nauðsynlegt er að nemendur geti æft sig þar sem þeir verða fyrir sem minnstri truflun og hafi ekki á tilfinningunni að þeir trufli aðra.
• Ungum nemendum þarf að hjálpa við að skipuleggja æfingatímann.
• Árangursríkara er að ungir nemendur æfi sig oftar og skemur í senn, en sjaldnar og lengur.
• Tónlistarnám þarf að vera ánægjulegt. Ánægjan felst ekki síst í stolti nemandans yfir eigin framförum og aukinni færni.
• Eðlilegt er að áhugi nemenda sé ekki alltaf samur og jafn. Ef nemandi sýnir merki um uppgjöf er mikilvægt að kennari og foreldrar/forráðamenn leiti orsaka og lausna. Stundum er nóg að skipta um viðfangsefni til að áhuginn glæðist á ný.
• Hlustun er mikilvægur þáttur í öllu tónlistarnámi. Með því að hlusta á vel flutta tónlist fá nemendur nauðsynlegar fyrirmyndir. Foreldrar/forráðamenn geta lagt sitt af mörkum með því að hvetja nemendur til að hlusta á fjölbreytta tónlist við margs konar aðstæður og með því að fara með þeim á tónleika þegar tækifæri gefast, bæði innan tónlistarskólans og utan.

---

Námskrá sem pdf-skjal